അന്ധവിശ്വാസത്തിന്‍റെ ചുഴിയില്‍

ഈ ഹൈടെക് യുഗത്തിലും ലക്ഷണമൊത്ത അന്ധവിശ്വാസികള്‍ വര്‍ദ്ധിച്ചു വരികയാണ്‌.
എല്ലാ മാസവും പതിമൂന്നാം തീയതി അനേകം ആളുകള്‍ യാത്ര ചെയ്യാത്തതുകൊണ്ടും ബിസിനസ് കരാര്‍ നടത്താത്തത് കൊണ്ടും 800-900 മില്യണ്‍ ഡോളര്‍ അമേരിക്കയില്‍ നഷ്ടമുണ്ടാകുന്നു ണ്ടത്രെ! 13 നല്ല ദിവസമല്ലെന്നു ചിന്തിക്കുന്ന സെലെബ്രിറ്റിസ്  ധാരാളം.
ഒരു ഗാലപ്പോള്‍ സര്‍വേയില്‍ തങ്ങള്‍ പല കാര്യങ്ങളിലും അന്ധവിശ്വസികള്‍ ആണെന്നു 27 ശതമാനം ആളുകള്‍  തുറന്നു സമ്മതിക്കുന്നു. കറുത്ത പൂച്ച വട്ടംചാടുന്നതും ഗോവണിക്കു കീഴെ നടക്കുന്നതും കണ്ണാടി പൊട്ടുന്നതും ഒക്കെ അശുഭ ലക്ഷണങ്ങളായി കാണുന്ന വിദ്യാസമ്പന്നര്‍ അനേകമുണ്ട്.
എന്താണിവരിങ്ങനെ?
- അലസമായ വ്യക്തിത്വ ശൈലി ഒരു കാരണം.അദ്ധ്വാനിച്ചു കാര്യങ്ങള്‍ നേടുന്നതിനേക്കാള്‍ എളുപ്പമാണല്ലോ അത്ഭുതങ്ങള്‍ നടക്കുമെന്ന് പ്രതീക്ഷിച്ചു ക്രിയകളും തന്ത്രമന്ത്രങ്ങളുമായി വട്ടംകറങ്ങുന്നത്‌.
- ചിലര്‍ക്ക്‌ യുക്തിരഹിതമായ ചിന്ത ഒരു നേരംപോക്ക് ആണ്.
- ചില അനുഷ്ഠാനങ്ങളില്‍ ആശ്രയിക്കുമ്പോള്‍ കാര്യങ്ങള്‍ തന്‍റെ നിയന്ത്രണത്തില്‍ ആണെന്ന തോന്നല്‍ ചിലര്‍ക്ക്  ആശ്വാസമാകുന്നു.
- നഷ്ടപ്പെടാന്‍ ഒന്നുമില്ല കിട്ടിയാല്‍ ലാഭം എന്ന ചിന്ത.
- സ്വയം ഉത്തരവാദിത്വം ഏറ്റെടുക്കുവാനുള്ള മടി. അന്ധവിശ്വാസം ഇവര്‍ക്കൊരു ഷെല്‍ട്ടര്‍ ഹൌസ് ആണ്.
- ചില വ്യക്തിത്വ പ്രത്യേകതകളും മനോരോഗങ്ങളും മാനസിക പ്രശ്നങ്ങളും തിരുത്തുവാന്‍ കഴിയാത്ത അന്ധവിശ്വാസത്തിന്റെ പിന്നിലെ തടങ്കല്‍ പാറകളാണ്.
അപകടകരമായ ചില അന്ധവിശ്വാസങ്ങളും ഉണ്ട്: പ്രാര്‍ത്ഥന മാത്രം മതി ചികിത്സ ആവശ്യമില്ലെന്നു ചിന്തിക്കുന്നവര്‍ മരണം വരെ സ്വയം ചികിത്സിക്കുകയോ സ്വന്തക്കാരെ ചികിത്സിക്കുവാന്‍ സമ്മതിക്കുകയോ ചെയ്യില്ല.
ഇവര്‍ അടഞ്ഞ മനസ്സുള്ളവരും ചില കാര്യങ്ങളില്‍ വിമര്‍ശനാല്മകമായി ചിന്തിക്കുവാന്‍ വിസമ്മതിക്കുന്നവരുമാണെന്നാണ് റോക്കി എന്ന മനശാസ്ത്രജ്ഞന്‍റെ അഭിപ്രായo.
 യുക്തിയും ന്യായവും കൊണ്ട് തിരുത്തുവാന്‍ ശ്രമിച്ചാല്‍ എതിര്‍ ന്യായവുമായി ഇവര്‍ തിരിച്ചടിക്കും. മതമൌലികവാദികളും വര്‍ഗിയ വാദികളും മനസ്സില്‍ അന്ധവിശ്വാസത്തിന്‍റെ  കോണ്‍ക്രീറ്റ് ഭിത്തിയുള്ളവരാണ്. ഈ ഭിത്തിയില്‍ തൊട്ടാല്‍ തൊട്ടവനെ തട്ടും. ഇവരോടൊപ്പം ജീവിതം പങ്കിടുന്നവരുടെ സഘര്‍ഷo കഠിനമാണ്. 
തുറവിയും സ്നേഹവും മാനവീകതയുമുള്ള ഇശ്വരവിശ്വാസത്തെ അന്ധവിശ്വാസത്തില്‍ നിന്നും വേര്‍തിരിച്ചു കാണേണ്ടതുണ്ട്. ഫലം കൊണ്ടു മാത്രമേ വൃക്ഷത്തെ തിരിച്ചറിയുവാന്‍ കഴിയു.

സ്വപ്നകുമാരികള്‍ എവിടെ ?

സന്തുലിതമായ ഉറക്കശീലമില്ലായ്മ ആരോഗ്യ പ്രശ്നങ്ങളിലേക്കും രോഗങ്ങളിലേക്കും നയിക്കുമെന്നു മെഡിക്കല്‍ സയന്‍സ് ആണയിട്ടു പറയുന്നു.ഇന്റര്‍നെറ്റ്- ദൃശ്യമാധ്യമങ്ങള്‍ രാവേറുന്നത്‌വരെ കണ്ണഞ്ചിപ്പിക്കുന്ന വിഭവങ്ങള്‍ വിളബുമ്പോള്‍ ഉറക്കത്തിന്‍റെ സമയം അപഹരിക്കപ്പെടുകയാണ്. ഇരുപത്തിനാല് മണിക്കുറും ഓവര്‍ടൈം ജോലി ചെയ്യുന്ന ഹൃദയത്തിനും ബ്രെയിന്‍നും പറയുവാന്‍ പരാതികള്‍ ഏറെയുണ്ടെന്നോര്‍ക്കണം.
ബ്രെയിന്‍ അറ്റകുറ്റ പണികള്‍ ചെയ്യ്തു തീര്‍ക്കുന്നത് ഉറക്ക സമയത്താണ്. ഉറക്കത്തിന്‍റെ ആദ്യഘട്ടങ്ങളില്‍ ആണ് കൂടുതല്‍ മെയിന്‍റെനന്‍സ് നടക്കുന്നത്. വൈകാരിക ഭാവങ്ങള്‍, ഹോര്‍മോണ്‍  തുടങ്ങിയവയുടെ സമീകരണം നിയന്ത്രിക്കുന്ന ന്യൂറോട്രാന്‍സ്മിറ്ററുകളുടെ പ്രവര്‍ത്തനക്ഷമതക്ക് ഉറക്കവും വിശ്രമവും അത്യാവശ്യമാണ്. അതുകൊണ്ടാണ് ഉറക്കം കുറയുമ്പോള്‍ മൂഡ് തെറ്റുന്നത്.
ഉറക്കം ദൈവത്തിന്റെ ദിവ്യക്രമീകരണം ആണെന്നും സുഖമായി ഉറങ്ങുവാന്‍ ആത്മശരീര മനസ്സുകളില്‍ ദൈവം ശാന്തത  പകരുന്നു എന്നുമാണ് ബൈബിളിലെ ദാവീദിന്റെ അഭിപ്രായം. ' ഞാന്‍ സമാധാനത്തോടെ കിടന്നുറങ്ങും, നീയല്ലോ യെഹോവേ, എന്നെ നിര്‍ഭയം വസിക്കുമറാക്കുന്നത്'. സങ്കീര്‍ത്തനങ്ങള്‍ 4:8.
ഉറക്കം ശരീരത്തിന്‍റെ വിശ്രമതീരമാണെന്ന്  ബൈബിള്‍ നുറിലധികം  പ്രാവശ്യം ആവര്‍ത്തിക്കുന്നു.
സകല പ്രപഞ്ചചാരാചരങ്ങളെയും സൃഷ്ടിച്ചശേഷം ദൈവം സ്വസ്ഥമായിരുന്നു . വര്‍ക്ക്ഹോളിക്ക് ആയ മനുഷ്യന്‍ വിശ്രമമില്ലാതെ പണിയെടുത്ത്, സൗഭാഗ്യo ആര്‍ക്കോവേണ്ടി വാരിക്കൂട്ടി, ഒടുവില്‍ RIP ആകുന്നു. ഇതല്‍പം നേരത്തേ ആയിക്കൂടേ, ന്‍റെ ചങ്ങാതി?

ജീവിതത്തിന്‍റെ വെല്ലുവിളികളും തിരക്കുകളും ഭയാശങ്കകളും ഉറക്കം നഷ്ടപ്പെടുത്താറുണ്ട്. ഉറക്ക ഗുളികകളും സ്ലീപ്‌ക്ലിനിക്കുകളും ഈ പ്രതിസന്ധികള്‍ക്ക് പരിഹാരമല്ല. ഉറങ്ങുവാന്‍ പോകുന്നതിനു മുന്‍പ് മനസ്സിനെ ഭാരപ്പെടുത്തുന്ന ഭാരങ്ങള്‍ ഇറക്കിവക്കാന്‍, ഭരമേല്പ്പിക്കാന്‍, അത്യുന്നതനും അപരിമേയനും ആയ ദൈവത്തില്‍ വിശ്വാസമുണ്ടെങ്കില്‍ സമാധാനത്തോടെ ഉറങ്ങുവാന്‍ കഴിയും. നമുക്കൊന്നും ചെയ്യുവനില്ലാ ത്തിടത്തു ദൈവം ചെയ്യട്ടെ എന്ന വിശ്വാസത്തിലും ആശ്വാസത്തിലും മനസ്സിനെ ഉറപ്പിക്കുമ്പോള്‍ ആന്തരിയ വികാരത്തിരകള്‍ ശാന്തമാകും. നിദ്രാദേവി കണ്‍പോളകളില്‍ ലാസ്യനൃത്തച്ചുവടുവക്കും. മഴവില്‍ വര്‍ണങ്ങളുടുത്ത സ്വപ്നകുമാരികള്‍ മുക്തരാഗങ്ങളും സ്നിദ്ധഭാവങ്ങളും കൊണ്ട് സ്വപ്നലോകം മായിക പ്രപഞ്ചമാക്കും.

യുക്തിരഹിതമായി വിശ്വസിക്കുന്ന വിശ്വാസിക്കു ലഭിക്കുന്ന ഈ നിദ്രാഭാഗ്യം സെല്‍ഫ്മെയ്‌ഡ് വിവേകികള്‍ക്കും ജ്ഞാനികള്‍ക്കും കിട്ടാറില്ല. അവര്‍ ബുദ്ധികൊണ്ടും യുക്തികൊണ്ടും കൂട്ടിക്കുറയ്ക്കുമ്പോള്‍ കിട്ടുന്നത് ഭിന്നസംഖ്യകള്‍ മാത്രമാണ്. പിന്നെയും തിരിഞ്ഞും മറിഞ്ഞും കിടന്നുകൂട്ടി ക്കൊണ്ടിരിക്കും, അപ്പോഴേക്കും കോഴി കൂകും.
" Each night, when I go to sleep, I die. And the next morning, when I woke up, I am reborn"- Mahatma Gandhi.    

മനസ്സിന്‍റെ കണ്‍ട്രോള്‍ ടവ്വര്‍

മനസ്സിന്‍റെ കണ്‍ട്രോള്‍ ടവ്വര്‍ ചിന്തകളാണ്. നമ്മളെയും മറ്റുള്ളവരെയും ജീവിത സാഹചര്യങ്ങളെയും വിലയിരുത്തുന്നതില്‍ നമ്മുടെ ചിന്തകള്‍ അനുകുല-പ്രതികുല സ്വാധീനo ചെലുത്തുന്നു. അതുകൊണ്ട് ചിന്തകളുടെ മേല്‍ ഒരു ചിന്തയും നിയന്ത്രണവും   ഉണ്ടായിരിക്കണo.

വിതെയും വിളവും വിളവെടുപ്പും നടക്കുന്നത് ചിന്തകളിലാണ്. ചിന്തകള്‍ വിതെക്കുമ്പോള്‍ പ്രവര്‍ത്തികള്‍ വിളയുന്നു,  പ്രവര്‍ത്തികള്‍ വിതെക്കുമ്പോള്‍ ശീലം വിളയുന്നു, ശീലം വിതെക്കുമ്പോള്‍ സ്വഭാവo വിളയുന്നു.സ്വഭാവമാണ്
ജീവിതത്തിന്റെ ഭാഗധേയം (destiny) തീരുമാനിക്കുന്നത്‌. ഇതിന്റെ പിന്നില്‍ നമ്മള്‍, നമ്മള്‍ മാത്രമാണ് കാരണക്കാര്‍. ആരെയും കുറ്റംപറഞ്ഞിട്ട് കാര്യമില്ല.

 മനസ്സിന്റെ വയല്‍പറമ്പില്‍ നല്ല ചിന്തകള്‍ വിതെച്ചാല്‍ വ്യക്തിത്വത്തില്‍ നുറുമേനി നന്മകള്‍ വിലയും, അത് നമുക്കും മറ്റുള്ളവര്‍ക്കും കൊയ്യാം.
ചിന്തകള്‍ക്കുള്ള ജൈവചേരുവകള്‍ മനസ്സു വലിച്ചെടുക്കുന്നത് കുടുംബം, ജീവിത സാഹചര്യങ്ങള്‍, സുഹ്രുബന്ധങ്ങള്‍, മീഡിയ തുടങ്ങിയവയില്‍ നിന്നാണ്. ഈ ബാഹ്യസാഹചര്യങ്ങള്‍ ആരോഗ്യകരമാണെങ്കില്‍ ചിന്തകളും അതിലുടെ രൂപപ്പെടുന്ന വാക്കുകളും പ്രവര്‍ത്തികളും മഹിതവും അന്തസ്സുറ്റതും ആയിരിക്കും.

ബൈബിളിലെ പൗലോസ്‌, ശൌല്‍ ആയിരുന്ന കാലത്ത് സങ്കുചിതമതമൌലികവാദങ്ങളുടെ പ്രചരകനും വക്താവും ആയിരുന്നു. മനസ്സിന്റെ മതില്‍ക്കെട്ടുകള്‍ പൊളിഞ്ഞു ദൈവത്തെ വിശാല ക്യാന്‍വാസില്‍ കാണുവാന്‍ തുടങ്ങിയപ്പോള്‍ അദ്ദേഹം സ്നേഹത്തിന്റെ അപ്പോസ്തോലനായി. ചിന്തകളിലും മനോ ഭാവങ്ങളിലും വന്ന ഈ മാറ്റത്തിനു പിന്നില്‍ രോഗബാധിതമായ ഭൌതിക സാഹചര്യങ്ങളില്‍ നിന്നുള്ള  മനസ്സിന്റെ ചുവടുമാറ്റമായിരുന്നു പ്രധാന കാരണം. സുകൃതപൂര്‍ണമായ ദൈവോന്മുഖതയിലേക്കു മനസ്സിന്റെ ശ്രദ്ധ തിരിച്ചാല്‍ മാത്രമേ സദ്‌ഗുണങ്ങളും സദ്‌ചിന്തകളും സല്‍പ്രവര്‍ത്തികളും വ്യക്തിത്വത്തില്‍ വിളങ്ങുകയുള്ളു എന്നാണ് സെന്‍റ പോളിന്‍റെ സാക്ഷ്യം: " ഭൂമിയില്‍ ഉള്ളതല്ല ഉയരത്തിലുള്ളതു തന്നെ ചിന്തിപ്പിന്‍".
'ഈശ്വര ചിന്തയിതൊന്നെ മനുഷ്യനു ശാശ്വതമീയുലകില്‍...'

മനസ്സില്‍ സംശുദ്ധമായ ചിന്തകളും ആശയങ്ങളും മുളക്കുവാന്‍ നല്ല വായനയും നല്ല സുഹൃബന്ധവും വേണം. അനുസരണം പഠിക്കാത്ത അനുസരണംകെട്ട ചിന്തകള്‍ക്കു പിറകെ ഓടുന്നവര്‍ക്ക് എന്നും അസ്വസ്ഥതയും ആവലാതിയും ആയിരിക്കും.

തീവ്രമായ ആത്മീയാനുഷ്ടാനങ്ങളും ആചരണങ്ങളും അനുഷ്ടിച്ചിട്ടും വാക്കുകളിലും പ്രവര്‍ത്തികളിലും നന്മ വിരിയാത്ത വിശ്വാസികളുടെ പ്രശ്നം, പഴയ തുരുത്തി യും പുതിയ വീഞ്ഞുമാണെന്ന് ക്രിസ്തു പറയുന്നു.

മനഷ്യരെ ഉപാധികളില്ലാത്ത സ്നേഹത്തിന്റെ കണ്ണു കൊണ്ടു കാണുവാന്‍ മനസ്സുപുതുക്കി രൂപാന്തരപ്പെടണo.
അതിന്, മനസ്സിന്റെ ടെക്നീഷ്യന്‍റെ വര്‍ക്ക്ഷോപ്പില്‍ ജീവവണ്ടി സറണ്ടര്‍ ചെയ്യണം.

തോല്‍ക്കാന്‍ മനസ്സില്ലെങ്കിലോ ?

പ്രതികൂല ജീവിതാനഭവങ്ങളില്‍ തളര്‍ന്നുപോകാതെ ലക്ഷ്യത്തിലേക്കു മുന്നേറുവാനുള്ള കഴിവിനാണ് അതിജീവനശക്തി (resilience)യെന്നു പറയുന്നത്. അതിജീവനശക്തിയും മാനസികാരോഗ്യവും തമ്മില്‍ വളരെ ബന്ധമുണ്ടെന്നാണ് വിദക്ധരുടെ അഭിപ്രായം. അനിഷ്ടസംഭവങ്ങളില്‍ വൈകാരിക സഘര്‍ഷവും തളര്‍ച്ചയും തോന്നുക സ്വഭാവികമാണ്. മാനസികാരോഗ്യമുള്ള വ്യക്തി അധികം താമസിക്കാതെ ഈ ഷോക്കില്‍ നിന്ന് വിമുക്തമായി ജീവിതം ചലനാത്മകമാക്കും. വൈകാരികബുദ്ധി, പ്രശ്നപരിഹാരത്തിനുള്ള കഴിവ്, സഹനശക്തി, സാമുഹ്യബന്ധങ്ങള്‍, ആത്മീയശക്തി  തുടങ്ങിയ അനുകുല ഘടങ്ങള്‍ സമന്വയിപ്പിച്ചാണ് ഇക്കുട്ടര്‍ ആരോഗ്യകരമായ മുന്നേറ്റം  സാദ്ധ്യമാക്കുന്നത്. ഈ കഴിവുകള്‍ കുറഞ്ഞവര്‍ ദുരന്തജീവിതാനഭവങ്ങളുടെ തേരില്‍ അര്‍ജുനനെപോലെ വാടിതളര്‍ന്നു പോകും.

അതിജീവനശക്തി എങ്ങിനെയാണ് വളര്‍ത്തിയെടുക്കുക?

ശ്രദ്ധാപൂര്‍വമായ പരിശീലനങ്ങളും മനോഭാവങ്ങളുടെ തിരുത്തിയെഴുതലും കൊണ്ടു സാധ്യമാകുമെന്നാണ് വിദക്ധാഭിപ്രായം.

 എന്താ ഒരു കൈ നോക്കുന്നോ?

1. ദുരന്തങ്ങളില്‍ തട്ടി വീണു കഴിഞ്ഞാല്‍ വീണിടത്തു തന്നെ കിടക്കാതെ കുടുംബാംഗങ്ങളും സുഹൃത്തുക്കളും സപ്പോര്‍ട്ട്ഗ്രൂപ്പൂo ഉള്‍പ്പെടുന്ന സാമുഹ്യബന്ധങ്ങളില്‍ ഷെല്‍ട്ടര്‍ കണ്ടെത്തണo. പിടിച്ചതു കൈവിട്ടു പോകുബോള്‍  കാല്‍ചവുട്ടി നില്‍ക്കാനും വിതക്കാനും കൊയ്യാനും കിളിയെ,  നമുക്കും വേണം ഒരു പിടി ഉറച്ചമണ്ണ്.

2. ഒരിക്കല്‍ അനുഭവിച്ച പ്രതിസന്ധിയുടെ തനിയാവര്‍ത്തനമാണ് ഇപ്പോഴത്തേതെങ്കില്‍  പണ്ട് സ്വീകരിച്ച ആരോഗ്യകരമായ സമീപനങ്ങള്‍ സ്വീകരിക്കുക. പരാജയപ്പെട്ട സമീപന മാര്‍ഗങ്ങള്‍ ഒഴിവാക്കുക.

3. മാറ്റം ജീവിതത്തിന്‍റെ യാഥാര്‍ത്ഥൃമാണെന്ന് അoഗീകരിക്കുക. നമ്മള്‍ വിഭാവനം ചെയ്യുന്നത് എപ്പോഴും സാധ്യമാക്കിത്തരാമെന്ന ഗ്യാരണ്ടിയൊന്നും ജീവിത മര്‍ക്കറ്റിലെ പ്രോഡക്റ്റിനില്ല. ദൌര്‍ഭാഗ്യങ്ങളെ ഓര്‍ത്ത് ദുഖിക്കാതെ വന്നതിനെ വന്നതുപോലെ  വന്നിടത്തുവച്ച് വരുന്നത്പോലെ നേരിടുക. ദാറ്റ്‌സ്‌ ററ്,  പിന്നല്ലാതെ.

4. പ്രതിസന്ധി കുറച്ചുകാലം തുടര്‍ന്നേക്കാം. അതുവരെ കരിംപട്ടിണിയും കണ്ണുനീരുമായി ചത്തുജീവിച്ചിട്ടൊന്നും  കാര്യമില്ല. നമ്മുടെ ശരീരമനസ്സിന്‍റെ  ഉന്നമനത്തിന് ആവശ്യമായ ഭക്ഷണം, വ്യായാമം, വിശ്രമo, വിനോദം, സൌഹൃദം തുടങ്ങിയ ആരോഗ്യചേരുവകള്‍ ഒന്നും ഒഴിവാക്കരുത്. റോം കത്തുമ്പോഴുo ചിലപ്പോള്‍ വീണ വായിക്കേണ്ടി വരും. ശൈത്യവും വസന്തവും ജീവിത യഥാര്‍ത്ഥങ്ങളാണ്. അതിന്‍റെ മേല്‍ നമുക്കു നിയന്ത്രണമില്ല. അത് അതിന്‍റെ വഴിക്ക് വരട്ട്, പോകട്ട്.

5. മറ്റുള്ളവരുമായി താരതമ്യ പഠനങ്ങള്‍ നടത്തിയും നഷ്ട്ടസ്വപ്നങ്ങള്‍ ആവര്‍ത്തിച്ചു വായിച്ചുo മനസ്സിലുണര്‍ത്തുന്ന നിഷേധ ചിന്തകള്‍ ആല്‍മപീഡനവും സ്വയപീഡനവുമാണ്. ബി പോസിറ്റീവ്, എല്ലാകാര്യങ്ങള്‍ക്കും പ്രതികൂല വശങ്ങള്‍ മാത്രമല്ല, അനുകൂല വശങ്ങളുമുണ്ട്. പെട്ടെന്ന് വായിക്കാന്‍ എളുപ്പം പ്രതികൂല വശങ്ങളാണ്. അനുകൂല വശങ്ങള്‍ വരികള്‍ക്കിടയിലും ചിന്തയുടെ ആഴത്തില്‍ വലയിറക്കിയാല്‍ മാത്രം കിട്ടുന്നതുമാണ്. പടകിന്റെ വലത്തുവശത്തു വലയിറക്കു, നിങ്ങളുടെ വല നിറയും.

6. ഒരു നല്ല നാളെക്കുള്ള മോഹം നല്ലതുതന്നെ. പക്ഷെ, അത് ഒറ്റച്ചാട്ടത്തിന് സാധ്യമാവില്ല. നമ്മള്‍ ആഗ്രഹിക്കുന്ന ലക്ഷ്യത്തിലെത്തിയവരുമായി സംസാരിക്കുക, മാര്‍ഗങ്ങള്‍ അന്വഷിച്ചു കണ്ടുപിടിക്കുക. മനസ്സൊരുക്കി  ലക്ഷ്യത്തിലേക്കു ചുവടുവക്കുക. ഒടുവില്‍ ചിറകുവിരിച്ചു നീലാകാശത്തിലേക്കു പറക്കുക. ആര്‍ക്കാണ് നിങ്ങളെ തടയുവാന്‍ കഴിയുക?

7. ജീവിതത്തില്‍ ഒറ്റപ്പെടല്‍ പലര്‍ക്കും ഒരു ഞെട്ടലാണ്. മീഡിയ-ഗോസിപ്പുകളിലൂടെ മറ്റുള്ളവരുടെ കാര്യങ്ങളും കാര്യക്കേടുകളും കണ്ടും കേട്ടും തളര്‍ന്ന നമുക്ക് നമ്മെപ്പറ്റി എന്തറിയാം? നിങ്ങളിലെ നിങ്ങളാരെന്നറിയുവാനുള്ള വിലപ്പെട്ട സമയങ്ങളാണ് ഏകാന്ത നിമിഷങ്ങള്‍. നിങ്ങളെപറ്റി നിങ്ങളെഴുതു-നിങ്ങളുടെ ഇഷ്ടങ്ങള്‍, അനിഷ്ടങ്ങള്‍, അറിവുകള്‍, കാഴ്ചപ്പാടുകള്‍, വികൃതികള്‍ ... എല്ലാം എഴുതു, എഴുതികൊണ്ടേയിരിക്കു. പത്തും, അറുപതും കൊല്ലം ജീവിച്ചിട്ടും നിങ്ങളെ നിങ്ങള്‍ക്ക്‌ അപരിചിതമായിരിക്കുന്നത് എത്ര വിചിത്രമാണ്. ഒരു കപ്പു കാപ്പിയുമായി, ഫോണും ടീവിയും മാറ്റിവച്ച്, സുഹൃത്തുക്കളില്ലാതെ, നിങ്ങള്‍  നിങ്ങളോടോപ്പം തനിച്ചിരിക്കു- ഇതില്‍പ്പരം ശാന്തിയും സമാധാനവും അനുഭവിക്കുന്ന നിമിഷങ്ങളുണ്ടോ? എന്‍ജോയ് ദ പവര്‍ ഓഫ് ലോണ്‍ലിനെസ്സ്!

8. ആത്മീയനുഭവങ്ങള്‍ക്കായി മനസ്സുതുറക്കുക. ആചാരാനുഷ്ഠാനങ്ങളും ആള്‍ദൈവങ്ങളും ഇഷ്ടമല്ലെങ്കില്‍ അതിനുമപ്പുറത്തെ അപരിമേയനും കരുണാമയനുമായ ആത്യന്തികശക്തിയില്‍ വിശ്വസിക്കുക, ആശ്രയിക്കുക. മനസ്സിനെ മടുപ്പിക്കുന്ന മീഡിയയില്‍ നിന്നു ധ്യാനത്തിലേക്കും സര്‍ഗസംഗീതത്തിലേക്കും ജീവനുണര്‍ത്തുന്ന വചനങ്ങളിലേക്കും മനസ്സിനെ തിരിപ്പിക്കുക.

  ഡണ്‍!
 ഗുഡ് ലക്ക് ബഡി !!




   

സൂക്ഷിക്കുക, ഞാന്‍ കൊത്തും

വിമര്‍ശനം വേദനാപൂര്‍ണമായ ഒരനുഭവമാണ് . ദേഷ്യം,ഭയം, ലജ്ജ, സുരക്ഷിത ബോധക്കുറവ് തുടങ്ങിയ മിശ്രവികാരങ്ങള്‍ ഉണര്‍ത്തുന്ന ദുരനുഭവം.

വിമര്ശനം വ്യക്തിത്വവളര്‍ച്ചക്ക് സഹായകമാണന്നാണ് വിന്‍സ്ടന്‍ ചര്‍ച്ചില്‍ പറയുന്നത്. ആയിക്കോട്ടെ ചര്‍ച്ചില്‍ സാര്‍.

മറ്റുള്ളവരുടെ വിമര്‍ശനത്തിന്റെ പിന്നിലെ അടിയൊഴുക്കുകള്‍ മനസിലാക്കിയാല്‍ സ്വയം തിരുത്തുവാനും വായില്‍ വാക്കത്തിയുമായി വരുന്നവരില്‍നിന്നു സുരക്ഷിത ദൂരം പാലിക്കുവാനും കഴിയും.

അറ്റന്‍ഷന്‍ ! വിമര്‍ശനത്തിന്റെ പിന്നിലെ വിവിധ ഉദ്ദേശ്യ താല്പര്യങ്ങള്‍ ഇതൊക്കെയാണ്:

നിങ്ങളുടെ കഴിവിലും വ്യക്തിത്വ സവിശേഷതകളിലും അപകര്‍ഷത തോന്നി ഫണം വിടര്‍ത്തുകയാണ് വിമര്ശകന്‍ -
  കൂള്‍ ഡൌണ്‍.

ടീം വര്‍ക്കില്‍ നിങ്ങള്‍ ആത്മാര്‍ത്ഥമായി ജോലി ചെയ്യാത്തതിന്റെ പ്രതികരണമാണ് ചില  വിമര്ശനങ്ങള്‍ -

വായടച്ചു പണിയെടുക്കു മിസ്റ്റര്‍.

ബഹുമാനവും കരുതലും നിങ്ങളില്‍ നിന്ന് പ്രതീക്ഷിക്കുന്നു, കിട്ടുന്നില്ല- അല്പം കൊടുത്തേക്കെന്നേ, നതിംഗ് ടു ലൂസ്

മത്സരഓട്ടത്തില്‍ നിങ്ങളെ പിന്നിലാക്കി മുന്നേറാന്‍ ബോസിന്റെ മുന്പില്‍  കളിക്കുന്ന കള്ളകളിയാണ് വിമര്‍ശനം  - 

കരുക്കള്‍ സുക്ഷിച്ചു നീക്കണമിഷ്ടാ.

വിമര്‍ശകന്‍ അധീശ മനോഭാവക്കാരനാണ്, പക്ഷെ അത് നിങ്ങളുടെ അടുത്ത് നടക്കുന്നില്ല- 

ഓര്‍ഡര്‍, ഓര്‍ഡര്‍!

സുരക്ഷിത ബോധമില്ലാത്ത , സ്വന്തം നിഴലിനെപ്പോലും വിശ്വസിക്കാത്ത സംശയ രോഗി- 

ടൈം ബോംബാണ്, ബി കെയര്‍ഫുള്‍.

നിങ്ങളുടെ ഫലിതവും നര്‍മവും ഉള്‍ക്കൊള്ളാന്‍ കഴിയാത്ത അരസികന്‍- 

ബീ സീരിയസ്, നോ കോമഡി പ്ലീസ്‌! 

തങ്ങളുടെ അറിവിന്റെ ഓഹരി നിങ്ങള്‍ക്കു പകര്‍ന്നുതന്നു നിങ്ങളെ ധന്യരാക്കുവാന്‍ ശ്രമിക്കുന്നു, പക്ഷേ നിങ്ങള്‍ ശ്രദ്ധിക്കുന്നില്ല - 

സെ, ആമ്മീന്‍.

നിങ്ങളുടെ ശ്രദ്ധ പിടിച്ചു പറ്റുവാനുള്ള എളിയ ശ്രമമാണ്- 

വിജയിച്ചില്ലെ ങ്കില്‍  എറിഞ്ഞു വീഴ്ത്തും( കൌമാരക്കാരും മിഡിലേജുകാരുമാണ് പ്രതികള്‍ )

വിമര്‍ശകന്റെ ലക്ഷ്യത്തിലെത്താന്‍ നിങ്ങള്‍ തടസ്സമാണ്- 

സൈഡ് പ്ലീസ്സ്.

നിങ്ങളുടെ ധിക്കാരമനോഭാവത്തിനു ബൌണ്ടറി ഇടുവാനുള്ള  ശ്രമമാണ്  വിമര്‍ശനം- 
ഉരുക്കുമുഷ്ട്ടി കൊണ്ടു തിരിച്ചടിച്ചിരിക്കും, കട്ടായം.

നിങ്ങളുടെ പെരുമാറ്റങ്ങള്‍ അസഹ്യമായതു കൊണ്ടുള്ള  വിമര്‍ശനം - 

ലീവ് മി എലോണ്‍.

അവരുടെ തെറ്റുകള്‍ മറച്ചുവക്കാന്‍ നിങ്ങളുടെ ബലഹീനതകളെ ഉയര്‍ത്തി ക്കാണിക്കുകയാണ്- 

ആളു സീബീഐ ആണ് കെട്ടോ, സൂക്ഷിക്കണം.

മെച്ചമായ ആശയവിനിമയത്തിനുള്ള കഴിവ് കുറഞവര്‍, ചക്കെന്നു പറയുന്നത് കൊക്കെന്നായിപ്പോകും-  

അയ്യോ പാവം, പ്രോഡക്റ്റ് ഡിഫെകറ്റ്.  
        

എല്ലാവരാലും ആദരിക്കപ്പെടണമെന്നു നിര്‍ബന്ധമുള്ള കാരണവന്‍മാര്‍- വൃദ്ധന്‍മാരെ സൂക്ഷിക്കുക!

സ്വന്തം മുറിവുകള്‍ വിമര്‍ശനം കൊണ്ടു മറയ്ക്കുന്നവര്‍- 

ഒട്ടിക്കു, സാന്ത്വനത്തിന്റെ   രണ്ടു മൂന്ന് ബാന്‍റെജുകള്‍.

സ്വയം ദൈവമായി കാണുന്ന, വിമര്‍ശനം സഹിക്കാത്ത, നാര്‍സിസ്റ്റുകള്‍ - പ്രേയ്സ്  ദ  ബോസ്!

 ലഹരി പോലുള്ള ദുശീലങ്ങള്‍ കൊണ്ടു സ്വന്തം ജീവിതം നശിപ്പിച്ച,  ഉപദേശം അലെര്‍ജിയായവരുടെ തിരിച്ചടി - 

ഞാന്‍ നന്നാവില്ലമ്മാവാ...

അധികാര കസേരയ്ക്കു വേണ്ടിയുള്ള പക്കാ പവ്വര്‍ പ്ലേ വിമര്‍ശനങ്ങള്‍-  
ധിം തരികിടകള്‍,  ജീവനുംകൊണ്ടോടിക്കോ....

                                                       ~~~~~~~~~~~~~~~~          

നീതിനിമിത്തം ഉപ്ദ്രവിക്കപ്പെട്ട ഒരു ദൈവത്തിന്റെ കഥയുണ്ട് ബൈബിളില്‍. ആ  ദൈവത്തിന്റെ പേര്‍ യേശുക്രിസ്തു എന്നായിരുന്നു. അദ്ദേഹത്തിനു ചുറ്റും എപ്പോഴും  ശത്രുക്കളും വിമര്‍ശകരും പീഡകരും ആയിരുന്നു. വിമര്‍ശനത്തിന്‍റെ മുള്ളുകളില്‍ ചവുട്ടി നിര്‍ഭയം നടന്ന അദ്ദേഹം വിമര്‍ശനത്തിന്‍റെ മുറിവേറ്റു പിടയുന്നവര്‍ക്ക് അനുകരിക്കാവുന്ന സമുന്നത മോഡലും അദ്ദേഹത്തിന്‍റെ വാക്കുകള്‍ സാന്ത്വനവുംമാണ്. 

ഒരുവട്ടം കൂടി...

വെറുപ്പിന് മനുഷ്യചരിത്രത്തിന്റെ തന്നെ പഴക്കമുണ്ട്. കമ്മ്യൂണിക്കേഷന്‍ മീഡിയയാണ് മനുഷ്യനിലെ വെറുപ്പിന്‍റെ ഭീഭത്സരൂപം പുറത്തുകൊണ്ടുവന്നത്. രോഗബാധിതമായ വ്യക്തിത്വത്തിന്റെ വികൃത മുഖവും മനസ്സിലെ വെറുപ്പിന്റെ കയ്പ്പും സംസ്ക്കാരതിന്റെ ജീര്‍ണതയും വെളിപ്പെടുത്തുന്നതാണ് മീഡിയയിലെ കമന്റ്കളും  ക്ലിപ്പുകളും.

പരിഹാസം, മുറിവേല്‍പ്പിക്കല്‍, ശപിക്കല്‍, വര്‍ഗവര്‍ണ്ണ ജാതികളുടെ പേരിലുള്ള താഴ്ത്തികെട്ടല്‍ ഒക്കെ മനസ്സിലെ വെറുപ്പിന്റെ പ്രകടനങ്ങളാണ്.

സംസ്കാരത്തിന്റെ അമൂല്യസമ്പത്തുകളായി കണക്കാക്കപ്പെടുന്ന പല  മഹാസാഹിത്യ കൃതികളും, ആനുകാലിക  ആക്ഷ്ന്‍ ത്രില്ലര്‍ സിനിമകളും സീരിയലുകളും, മത-രാഷ്ട്രിയ സoഘട്ടനങ്ങളുമൊക്കെ അടുത്ത തലമുറയെ  വെറുപ്പിന്റെ ജീര്‍ണപാഠo  പഠിപ്പിക്കുന്ന വേദികളാണ്.

 നിരുപദ്രവകാരികളായ പക്ഷിമൃഗാദികളെപ്പോലും പകവീട്ടുന്ന പ്രതികാരദാഹികളായി ചിത്രീകരിക്കുന്ന കാര്‍ട്ടൂണ് സീരിയലുകള്‍ ശിശുമനസ്സില്‍ വെറുപ്പിന്റെ കരിമഷിക്കോലങ്ങള്‍ വരയ്ക്കുകയാണ്.

വെറുപ്പും പ്രതികാരവും ആണത്വത്തിന്റെ ലക്ഷണമാണെന്നും അവരെ മറ്റുള്ളവര്‍ ഭയബഹുമാനത്തോടെ കാണുന്നു എന്നൊക്കെയുള്ള  ചിന്താഗതി ശരിയല്ല. വെറുപ്പ്‌ നമ്മെ ശക്തരാക്കുന്നില്ല. മനസ്സിലെ ആദ്രവികാരങ്ങളുടെ നീര്‍ച്ചാലുകള്‍ വറ്റിക്കുന്ന, ഹൃദയം കഠിനമാക്കുന്ന, കറുത്ത സൂര്യനാണ് വെറുപ്പ്‌.

വെറുപ്പും വിദ്വേഷവുമാകുന്ന നിഷേധ വികാരങ്ങള്‍ സംഘര്‍ഷo വര്‍ദ്ധിപ്പിക്കുകയും ശരീരം സ്‌ട്രെസ് ഹോര്‍മോണ്‍ അമിതമയി പുറപ്പെടുവിക്കുകയും അത് പല മനോ-ശാരിരിക രോഗങ്ങള്‍ക്കു കാരണമാവുകയും ചെയ്യുന്നു- ശാസ്ത്രo സാക്ഷി!

തോക്കുകളെക്കാള്‍ മനുഷ്യന് ഭീഷണിയുണ്ടാക്കുന്നത്‌  മനുഷ്യമനസ്സിലെ പകയും വെറുപ്പുമാകുന്ന അപകട മിസൈലുകളാണ്.

 അധാര്‍മ്മികമായി പെരുമാറിയവരെ വെറുക്കാതിരിക്കുവാന്‍ നമ്മള്‍ വിശുദ്ധന്മാര്‍ ആണോ എന്ന് ചോദിച്ചേക്കാം. വെറുപ്പെന്ന വികാരം തെറ്റല്ല, സ്വാഭാവികവും നൈസര്‍ഗ്ഗികവുമാണ്. വെറുപ്പ്‌ പ്രകടിപ്പിക്കുമ്പോള്‍ വികാരസമ്മര്‍ദം താത്കാലികമായി കുറയുന്നു എന്നതും  ശരിയാണ്. പക്ഷെ, വെറുപ്പ്‌ പ്രകടിക്കുമ്പോഴുണ്ടാകുന്ന ആന്തരീയ കോളിളക്കത്തിനും  അസ്വസ്തക്കും ആരു സമാധാനം പറയും? അപ്പോഴും നഷടമാര്‍ക്കാണ്?

ജീവിതകാലം മുഴുവന്‍ മുറിവേല്‍പ്പിച്ചവരോടുള്ള  പ്രതികാര ചിന്തകള്‍ മനസ്സില്‍ സുനാമിയായി ആഞ്ഞടിക്കുമ്പോള്‍ എങ്ങനെ സമാധാനം കിട്ടാനാണ്‌? ആത്മീയവേദികളില്‍ കയറിയിറങ്ങുന്ന പലര്‍ക്കും ശാന്തി ലഭിക്കാത്തതിന്‍റെ കാരണം  വെറുപ്പിന്റെ  മേഘാവൃതമായ അന്തരംഗമാണ്.

കള്‍ച്ചറല്‍ ആന്ത്രോപ്പോളജിസ്റ്റ്  Janice Harper പറയുന്നത്‌, മനസ്സിലെ വെറുപ്പിനെ പുറത്തുകടത്തി പടിയടച്ചില്ലെങ്കില്‍ ജീവിതകാലം മുഴുവന്‍ ദുരന്ത നായികാനായകന്‍മാരായി  തുടരേണ്ടി വരുമെന്നാണ്. ഒരാള്‍ നമ്മുടെ ശരിരത്തില്‍ മുറിവുണ്ടാക്കിയാല്‍ മുറിവുകെട്ടി, മരുന്ന് വച്ച്, പെട്ടന്ന് മുറിവുണക്കും. ഹൃദയത്തിലെ മുറിവുകളെ  നിത്യ മുറിവുകളായി സുക്ഷിക്കുന്നതെന്തിനാണന്നാണ് മാഡം ചോദിക്കുന്നത്.

ന്യുറോ കെമിക്കല്‍ ആലേഖനങ്ങളായ വെറുപ്പിന്റെ ഫയലുകള്‍ ഡിലീറ്റു ചെയ്യല്‍ അത്ര എളുപ്പമല്ല. പക്ഷേ, പ്രതിയോഗിക്ക് നിരുപാധികം മാപ്പുകൊടുത്താല്‍  പിന്നെ ആ ഫയലുകള്‍ വീണ്ടും മറിച്ചു വായിക്കാനുള്ള മനസ്സിന്റെ താല്പര്യം കുറയും. ക്രമേണ അത്തരം ഫയലുകള്‍ മറവിയുടെ സ്റ്റോര്‍ റൂമിലേക്ക് മാറ്റപ്പെടുകയും ഡീ ആക്ടിവേറ്റു ചെയ്യപ്പെടുകയും ചെയ്യും.

കടക്കാരോട് ക്ഷ്മിക്കുമ്പോള്‍ നിഷേധചിന്തകളുടെയും വെറുപ്പിന്റെയും ആയുധപ്പുരയാകുന്ന മനസ്സ് വെടിപ്പാക്കപെടുകയാണ്. അപ്പോള്‍ നീതിയും സമാധാനവുo സന്തോഷവുമാകുന്ന സ്വര്‍ഗം താഴ്ന്നിറങ്ങും.

Someday, we'll forget the hurt,the reason we cried and who caused us pain.
We will finally realize that the secret of being free is not revenge, but letting things unfold in their own way and own time.
After all, what matters is not the first, but the last chapter of or life which shows how well we ran the race. 
So smile, laugh, forgive, believe, and love all over again!

-saying images.com

അപരാധമെന്തു ഞാന്‍ ചെയ്തു...?

കുറ്റവാളികളുടെ മനശ്ശാസ്ത്രം ജിജ്ഞാസയുണ്ടാക്കുന്നതാണ്. കൊല, ബലാല്‍സംഗം, മോഷണം, വര്‍ഗ്ഗീയകലാപം,നിയമലംഘനം തുടങ്ങിയ സമൂഹദ്രോഹ കുറ്റങ്ങളില്‍ ഏര്‍പ്പെടുന്നവര്‍ ഉണ്ടാകുന്നത് എന്തുകൊണ്ടാണ്? എല്ലാ സംസ്കാരങ്ങളിലും രാജ്യങ്ങളിലും വര്‍ഗങ്ങളിലും ഇത്തരം വികല വ്യക്തിത്വങ്ങളുള്ളതുകൊണ്ട്  ഇതിന്റെ പിന്നില്‍ പൊതുവായ കാരണങ്ങള്‍ ഉണ്ടായിരിക്കണമെന്ന സ്വഭാവ ശാസ്ത്രജ്ഞന്‍മാരുടെ അന്വേഷണത്തിനു നൂറ്റാണ്ടുകളുടെ പഴക്കമുണ്ട്.

മസ്തിഷ്കത്തിന്റെ ഘടനയി ലും പ്രവര്‍ത്തനക്ഷമതയിലുമുള്ള വൈവിധ്യം ക്രിമിനല്‍ വാസനയ്ക്ക് കാരണമാകുന്നുവെന്നാണ് ഒരുകൂട്ടം വിദക്ധരുടെ കണ്ടെത്തല്‍. ഭയം, വിദ്വേഷം, സാമൂഹ്യ ഇടപെടല്‍ തുടങ്ങിയ മനസ്സിന്റെ പ്രവര്‍ത്തനങ്ങള്‍ നിയന്ത്രിക്കുന്ന മസ്തിഷ്കത്തിലെ 'amygdala' എന്ന ഭാഗത്തിന്റെ വളര്‍ച്ചക്കുറവും കുറഞ്ഞ പ്രവര്‍ത്തന ക്ഷമതയുo ഉള്ളവര്‍ വൈകാരിക നിയന്ത്രണം കുറഞ്ഞവരും അക്രമ വാസനയും സാമുഹ്യവിരുദ്ധ പ്രവണതകളും കൂടുതലുള്ളവരും  ആയിരിക്കുമെന്ന് Dr. Dustin Pardin (University of Pittsburgh), Dr.  Andrea Glenr ( University of Alabama) എന്നിവര്‍  നടത്തിയ ന്യുറോ ഇമേജിങ് പഠനത്തില്‍ കണ്ടെത്തി.

വൈകാരിക വേലിയേറ്റങ്ങളെയും സ്വഭാവത്തേയും നിയന്ത്രിക്കുന്ന മസ്തിഷ്കത്തിലെ 'Anterior Cingalate Cortex' (ACC) ന്‍റെ കുറഞ്ഞ പ്രവര്‍ത്തന ക്ഷമതയും കുറ്റകൃത്യങ്ങള്‍ക്കു പ്രേരണ നല്‍കുന്നു എന്നാണ് Dr. Kent Kiehl-ന്‍റെ      ( university of Mexico) അഭിപ്രായം. കുറഞ്ഞ ACC  പ്രവര്‍ത്തന ക്ഷമതയുള്ള കുറ്റവാളികള്‍ കൂടിയ പ്രവര്‍ത്തന ക്ഷമതയുള്ള കുറ്റവാളികളെക്കാള്‍ തെറ്റുകള്‍ വീണ്ടും വീണ്ടും ആവര്‍ത്തിക്കുന്നതായി  കണ്ടു.

കുറ്റകൃത്യങ്ങളെപ്പറ്റി  പഠിക്കുന്ന Dr. Raine-ന്‍റെ 'the anatomy of violence' എന്ന പുസ്തകത്തില്‍, മസ്തിഷ്കത്തിലെ പരിമിതികള്‍ ചെറുപ്പത്തില്‍  തിരിച്ചറിഞ്ഞു അവബോധശേഷി പരിശീലനവും ( cognitive skill training) പ്രത്യേക  പോഷക പരിപാലനവും നടത്തിയാല്‍ മസ്തിഷ്കത്തിന്‍റെ ഘടനയിലും പ്രവര്‍ത്തന ക്ഷമതയിലും വ്യത്യാസങ്ങള്‍ വരുത്തുവാനും സ്വഭാവ    പ്രശ്നങ്ങള്‍ വളരെയധികം പരിഹരിക്കുവാനും  കഴിയുമെന്ന് ചൂണ്ടിക്കാ ണിക്കുന്നു.

ബാല്യകാലത്തിനു ശേഷം തലച്ചോറിലെ കോശങ്ങള്‍ വളരില്ലെന്ന മുന്‍ധാരണ തിരുത്തിയെഴുതിക്കൊണ്ടിരിക്കയാണ്. ന്യുറോണുകളിലെ വൈദ്യുതി തരംഗങ്ങള്‍ കൈമാറ്റം ചെയ്യപ്പെടുന്ന dendrites-ന്‍റെ ഘടനയില്‍ വളര്‍ച്ചയും തളര്‍ച്ചയും ശ്രദ്ധിക്കപെട്ടിട്ടുണ്ട്. അതുകൊണ്ട് ബ്രെയിന്‍ സെല്ലുകളുടെ ഘടനയിലുള്ള മാറ്റങ്ങള്‍ മരുന്നുകൊണ്ടും മനശാസ്ത്ര ചികിത്സകൊണ്ടും മാറ്റുവാന്‍ കഴിയുന്ന കാലം അതിവിദൂരമല്ലെന്ന് വിശ്വസിക്കാം.

സമുഹത്തിലെ 3 ശതമാനം പുരുഷന്മാരിലും 1 ശതമാനം സ്ത്രീകളിലുo കണ്ടുവരുന്ന സമുഹവിരുദ്ധ കുറ്റവാസനകള്‍ വലിയ അസ്വസ്ഥതയും ആകാoഷയുമാണ് നിയമപാലകര്‍ക്കും സാധാരണ പൌരന്മാര്‍ക്കും ഉണ്ടാക്കുന്നത്.രോഗബാധിതമായ പാരമ്പര്യ ഘടകങ്ങളും ബാല്യത്തിലെ ദാരിദ്ര്യo മൂലമുള്ള  പോഷകക്കുറവും വൈകല്യമുള്ള മസ്തിഷ്ക ഘടനയും മുലം ആട്ടിന്‍കൂട്ടത്തിലെ ചെന്നായ്ക്കളായി മാറുന്ന ഇവരെ എന്തു ചെയ്യണം?

നമ്മള്‍ നല്ലവരായതു നമ്മുടെ കഴിവ്കൊണ്ടല്ല, നല്ല പാരമ്പര്യവും ജീവിത സാഹചര്യങ്ങളും  തലച്ചോറില്‍ നല്ല സോഫ്റ്റ്‌വെയര്‍ സെറ്റ്ചെയ്തു കിട്ടിയതു കൊണ്ടുo മാത്രമാണ് . നമ്മുടെ  ഭാഗ്യമെന്നല്ലാതെന്തു പറയാന്‍, അല്ലെ ?

 സമൂഹത്തില്‍ അസ്വസ്ഥത വിതയ്ക്കുന്ന പാതകധിക്കാരികളായ നമ്മുടെ ഈ സ്വന്തം സഹോദരങ്ങളെ,  എന്തു ചെയ്യണം? ഭീഷണിക്കോ, പീഡനത്തിനോ, തോക്കിനോ, കാരാഗ്രഹത്തിനോ ഇവരെ നന്നാക്കുവാന്‍ കഴിയില്ലെന്ന് ചരിത്രം സാക്ഷി...
 നിയമപാലകര്‍  പഠിച്ചിരിക്കേണ്ട ക്രിമിനോളജിയുടെ ബേസിക് പാഠമാണിത്. വെറുതെ തോക്കും ബോംബുമായി ഓടിനടന്ന് മനുഷ്യക്കുരുതി നടത്തിയിട്ട്   ഒരു കാര്യവുമില്ല. വീണ്ടും വീണ്ടും  പിറന്നു വീഴുന്ന  കോടി കോടി വികല ജന്മങ്ങള്‍ വിദ്വേഷ കൊടുംകാറ്റായ് ആഞ്ഞടിക്കും...

കര്‍ഷകന്‍ വിതച്ചപ്പോള്‍ ചിലത് വഴിയരുകില്‍, ചിലത് മുള്ളിന്നടിയില്‍, മറ്റുചിലത് പാറയില്‍ വീണു ... ഈ നിര്‍ഭാഗ്യ വിത്തുകള്‍ ചെയ്ത തെറ്റെന്താണ്?

ഇവര്‍ക്ക് വേണ്ടത് വിലങ്ങുകളല്ല,  കരുണയും സ്നേഹവുമാണ്. വികാര-വിചാര  വേലിയേറ്റങ്ങളെ നിയന്ത്രിക്കുന്ന മനസ്സിന്റെ രസതന്ത്ര ചേരുവകള്‍ തകരാറിലായ  ഇവരുടെ  മനസ്സിന്റെ ഫൈന്‍ ടൂണിംങ്ങിന് ന്യൂറോസയന്‍സ് ഗൌരവമായ അന്വേഷണം തുടങ്ങണം.


" നിങ്ങളെങ്ങനെ നിങ്ങളായെന്നു നിങ്ങള്‍ക്കറിയാമോ "- കടമ്മനിട്ട.
---------------------------------------------------------------------------------
American Journal Of Psychiatry, 2003.

Live to Forgive

ദൈവവും കോടതിയും സമൂഹവും ക്ഷമിച്ചിട്ടും  സ്വന്തം മനസ്സാക്ഷി മാപ്പ് കൊടുക്കാത്തതിന്റെ ആന്തരീയ സഘര്‍ഷവും പ്രതിസന്ധിയും അതിഭാവുകത്തൊടെ അവതരിപ്പിക്കുന്ന, ജീവിത സംഭവത്തില്‍നിന്ന് അടര്‍ത്തിയെടുത്ത, സിനിമയാണ്:' Live to forgive'.

ഭാര്യയെ കൊന്ന് ജയില്‍വാസത്തിനു ശേഷം മോചിതനായ മനുഷ്യന്റെ പ്രശ്നം മനസ്സാക്ഷിക്കോടതിയുടെ നിരന്തരം ചോദ്യംചെയ്യലായിരുന്നു. സമാധാനം നഷ്ട്ടപ്പെട്ട്‌ അദ്ദേഹം ആത്മഹത്യക്ക് ശ്രമിച്ചു. അപ്പോഴാണ്‌ കൊല്ലപ്പെട്ട ഭാര്യയുടെ മുന്‍ ബന്ധത്തിലുള്ള മകന്‍ (Jean Eric Smith) തന്റെ അമ്മയുടെ ഘാതകന് മാപ്പ് നല്കാന്‍ കടന്നു വരുന്നത്. സ്വയം മാപ്പുകൊടുക്കുവാനും മനസ്സിന്റെ ഭാരം ഇറക്കിവക്കുവാനും  ക്രിസ്തീയ കാഴ്ചപ്പാടുള്ള    ഈ മകന്‍ അദ്ദേഹത്തെ സഹായിക്കുന്നതാണ് കഥാസാരം.

ക്രൂരകൃത്യം ചെയ്തു കഴിയുമ്പോള്‍ മനസ്സാക്ഷിയുണ്ടാക്കുന്ന  പ്രതിസന്ധികള്‍ പ്രതിയുടെ മുന്‍പിലെ വലിയ വെല്ലുവിളികളാണ്. മാപ്പ് ചോദിച്ചാലും മാപ്പുകൊടുത്താലും പ്രായശ്ചിത്തo ചെയ്താലും സ്വന്തം മനസ്സാക്ഷിക്കോടതി വെറുതെ വിടില്ല...സ്വയം മാപ്പുകൊടുക്കുന്നതുവരെ അസ്വസ്ഥതയും വൈകാരിക കോളിളക്കവും തുടര്‍ന്നു കൊണ്ടേയിരിക്കും. ബോധ-അബോധ തലങ്ങളില്‍ കാറുo തിരമാലകളും ആഞ്ഞടിച്ചുകൊണ്ടേയിരിക്കും. സമാധാനം കിട്ടുകയുമില്ല.

എങ്ങിനെയാണ് സ്വയം മാപ്പുകൊടുക്കുക?

മനസ്സാക്ഷിയെ മുറിവേല്‍പ്പിക്കുന്നതുപോലെ അത്ര എളുപ്പമല്ല മുറിവുണക്കല്‍.
നിര്‍ഭാഗ്യ സംഭവത്തിനു ശേഷം മനസ്സാക്ഷി ഉയര്‍ത്തുന്ന അപായ സൂചനയായ കുറ്റബോധത്തിലാണ് പ്രശ്നം തുടങ്ങുന്നത്. കുറ്റബോധത്തെ ലഹരികൊണ്ടും, ആത്മീയ അനുഷ്ടാനങ്ങള്‍ കൊണ്ടും എതിര്‍വാദം കൊണ്ടും അടിച്ചമാര്‍ത്താമെന്നാരും വ്യാമോഹിക്കരുത്. മനസ്സാക്ഷിയുടെ ഡീ ഫാള്‍ട്ടു സെറ്റിംഗ് ആയ  കുറ്റബോധം സൈറന്‍ മുഴക്കികൊണ്ടേയിരിക്കും   . അസ്വസ്ഥതയുടെ അന്തരീയസഘട്ടനമുണ്ടാക്കുന്ന, ആത്മഹത്യയിലേക്കുവരെ നയിക്കുന്ന  അപകട വികാരമാണിത്. സ്വയം മാപ്പുകൊടുക്കുവാനുള്ള ചുവടുവൈപ്പുകള്‍   ഇവിടെനിന്ന്  തുടങ്ങണം.

ഒന്നാമത്, അനിഷ്ടസംഭവങ്ങളുടെ ഒരു പുനര്‍വായനക്ക് തയ്യാറാകണം. സംഭവസമയത്ത് മനസ്സൊപ്പിയെടുത്ത തീവ്രവികാരങ്ങളിലേക്കുള്ള മടക്കയാത്ര  ആത്മതപനവും സഹനവുമാണ്.പക്ഷെ ആ വഴിയെ വീണ്ടും നടന്നേ പറ്റു.

രണ്ടാമത്, സ്വയനീതികരണം ഒഴിവാക്കി, സംഭവത്തിന്റെ ഉത്തരവാദിത്തം ഏറ്റെടുക്കലാണ്. മനസ്സേ, മാപ്പുതരിക, ഞാന്‍ ചെയ്തത്  തെറ്റായിപ്പോയി എന്ന് തുറുന്നു സമ്മതിച്ചു  കീഴടങ്ങണഠ .

ഒടുവില്‍, സ്വന്തം മൂല്യബോധത്തിന്റെയും വിശ്വാസത്തിന്റെയും തിരുത്തിയെഴുതലുകള്‍ക്ക് തയ്യാറാകണം.' എനിക്കെന്റെ സ്വതന്ത്ര്യം, ഞാനെന്റെ ദൈവം' തുടങ്ങിയ തെറ്റായ മൂല്ല്യബോധങ്ങള്‍ തിരുത്തിയെഴുതി മാനുഷികമൂല്ല്യങ്ങള്‍ അംഗീകരിക്കുവാന്‍ തയ്യാറാകുമ്പോള്‍ മനസ്സാക്ഷിക്കോടതി വെറുതെ വിടും.

അപ്പോള്‍  മനസ്സാക്ഷിയുടെ ടെക്നീഷ്യനായ ഡിവൈന്‍ ഹീലര്‍ കുറ്റബോധത്തിന്റെ അലാറം റീസെറ്റ് ചെയ്യും.

 യെസ്,  നൌ യു ആര്‍ ഓള്‍ സെറ്റ് !

'ഒടുവിലത്തെ കാശുപോലും കൊടുത്തു തീരുവോളം നീ അവിടെനിന്നു പുറത്തു വരികയില്ല എന്നു ഞാൻ സത്യമായിട്ടു നിന്നോടു പറയുന്നു...' (മത്തായി 5:26) എന്ന യേശുവിന്റെ വാക്കുകളുടെ അര്‍ത്ഥവും ആഴവും എത്ര അധികമാണ്!

കുറ്റബോധത്തിന്റെ തടവറയില്‍ നിന്നുള്ള മോചനം എത്ര ശ്രമകരമാണ്.
അതുകൊണ്ട്,

മാനിഷാദാ, മാനിഷാദാ, മാനിഷാദാ, മാനിഷാദാ, മാ..നി..ഷാ..ദാാാാ...

"Will all great Neptune's ocean wash this blood 
Clean from my hand? No, this my hand will rather
The multitudinous seas incarnadine,
Making the green one red..."

-Othello, William Shakespeare.

മനുഷ്യ മനസ്സു തീറെഴുതിക്കിട്ടിയവര്‍

ഞങ്ങളുടെ പാലിയേറ്റിവ് കെയര്‍ യൂണിറ്റിലെ മുപ്പതു വയസ്സുള്ള ജിന്‍സി ബ്രെയിന്‍ സര്‍ജറിക്കു ശേഷം ശരിരം തളര്‍ന്നു കിടക്കുകയാണ്.സംസാര ശേഷിയില്ല, ടുബിലുടെയാണ് ഭക്ഷണം. രണ്ടു പിഞ്ചുകുഞ്ഞുങ്ങളോടും പ്രിയപ്പെട്ടവനോടും ഒപ്പം സന്തോഷമായി കഴിഞ്ഞു പോരുംബോഴാണ് ദുരന്തം അവളുടെ മേല്‍ കരുണയില്ലാത്ത കടന്നുകയറ്റം നടത്തിയത്.

കഴിഞ്ഞദിവസം അവളോട്‌ സംസാരിച്ചപ്പോള്‍ ആരാണ് ജിന്‍സിയുടെ ഇഷ്ട നടന്‍ എന്ന്‍ ചോദിച്ചു. നിര്‍വികാരതയുടെ മരവിപ്പുള്ള  അവളുടെ മുഖത്ത് പ്രസാദാല്മകമായൊരു മാനം തെളിഞ്ഞു! വര്‍ഷങ്ങള്‍ക്കുശേഷം അവളൊന്നു പുഞ്ചിരിച്ചു. പിന്നെ ശബ്ദമില്ലാതെ ചുണ്ടനക്കി പറഞ്ഞു: മ..മ്മു...ട്ടി.

നിസ്സഹായതയുടെ നീര്ച്ചുഴിയില്‍ ദുര്‍ബലയായി പിടയുംബോഴും, പണ്ട് കണ്ടാസ്വദിച്ച മഹാകലാകാരന്റെ കലാവിരുന്നിന്റെ മധുരസ്മരണകള്‍ ഹൃദ്യവികാര നീര്‍ചാലുകളായി അവളില്‍ ഒഴുകിയെത്തുന്നത്‌ അസുലഭ കാഴ്ചയായിരുന്നു.

രാവും പകലും വിശ്രമമില്ലാതെ കഠിനാധ്വനത്തിലൂടെ  നമ്മുടെ അനുഗ്രഹീത കലാകാരന്‍മാര്‍ ഒരുക്കുന്ന ദൃശ്യവിരുന്ന് അല്‍പ സമയത്തെക്കെങ്കിലും എത്ര എത്ര തകര്‍ന്നു തളര്‍ന്ന മനസ്സുകളെയാണ് ഊഷ്മള വികാര തേരിലേറ്റുന്നത്! മെഡിക്കല്‍ സയന്‍സിനു പോലും സാധിക്കാത്ത അത്ഭുത സിദ്ധിയാണ് കലാകാരന് ഡിവൈന്‍ കോമേഡിയന്‍ കൊടുത്തിരിക്കുന്നത്. മനസ്സിന്റെ താളം തെറ്റിയ മനോരോഗിയുടെ മനസ്സിനകത്തുപോലും കലാകാരന്‍ നിഷ്പ്രയാസം കടന്നു ചെല്ലുന്നു, അനുഭൂതിയുടെ ലോകം സൃഷ്ടിക്കുന്നു.

ഇതില്‍പ്പരം ഭാഗ്യവും സുകൃതവും എന്തുണ്ട്?

കലാകാരന്‍ അമരണനാണ്!

പ്രിയ മമ്മുക്ക, വാക്കുകള്‍ കൂട്ടിചേര്‍ത്തു ചൊല്ലുവാന്‍ കഴിയാത്ത പ്രിയ ജിന്‍സിക്കു വേണ്ടി അങ്ങയ്ക്ക്: സ്നേഹാഭിവാദനങ്ങള്‍  !

തീയിപ്പോഴും കത്തിക്കൊണ്ടിരിക്കയാണ്...

കരാളഹസ്ത്ങ്ങളില്‍ പിച്ചിചീന്ത പെട്ടപ്പോള്‍, ജീവനും ജീവനേക്കാള്‍ വിലപ്പെട്ടതും സംരക്ഷിക്കാന്‍ സാഹസിക പോരാട്ടം നടത്തിയപ്പോള്‍, നിന്റെ മനസ്സില്‍ സംക്രമിച്ചത് ഹൈവോള്‍ട്ടേജ് മിന്നര്‍പ്പി ണറു കളായിരുന്നു...

പീഡനങ്ങളില്‍ ദൃശ്യമുറിവുകളെക്കാള്‍ ദൂരവ്യാപകമായ നാശനഷ്ങ്ങളുടാക്കു ന്നത് അദൃശ്യമുറിവുകളാണ്( invisible wounds). അതുകൊണ്ടാണ് അറിയുന്നവരില്‍ നിന്നെല്ലാം അഞ്ചു വര്‍ഷക്കാലം അകന്നു ഏകാന്ത ജീവിതം ജീവിച്ചിട്ടും അന്തരoഗത്തിലെ അന്ഗ്നിപര്‍വതം ആവിയും തീയുമായി ഇപ്പോഴുംകത്തിയെരിയുന്നത്.

ആരില്‍ നിന്നെല്ലാം ഒളിച്ചോടിയാലും ദുരന്ത ദുഖങ്ങള്‍ മറവു ചെയ് തിരിക്കുന്ന സ്വന്തം അബോധതലങ്ങളിലെ ശ്മശാന ഭൂമിയില്‍ നിന്നും എവിടെ പോയോളിക്കാനാണ്?

ശാരീരികപീഡനത്തിലെ  മുറിവുകള്‍ ഉണങ്ങിയാലും വൈകാരിക പീഡനത്തിലെ മുറിപ്പാടുകള്‍(emotional wounds) പെട്ടെന്നൊന്നും സുഖമാവില്ല. സന്തോഷം, ആത്മവിശ്വാസം, ശുഭപ്രതീക്ഷ  എന്നീ മൂന്നു തലങ്ങളില്‍ ആണ് വൈകാരിക മുറിവുകള്‍ പ്രധാനമായും  പിരിമുറുക്കമുണ്ടാക്കുന്നത്.

ദുരന്തനായികയെപ്പറ്റി  നിര്‍ഭാഗ്യവതി, ഭാവി നഷ്ട്ടപെട്ടവള്‍, പാപി,  തുടങ്ങി സമൂഹം പഠിപ്പിച്ച അശുഭചിന്തകള്‍ അച്ചടക്കമില്ലാത്ത നിന്റെ മനസ്സ്   ആവര്‍ത്തിച്ചു പാടിക്കൊണ്ടിരിക്കുന്നതാണ് നിന്റെ ഇപ്പോഴത്തെ പ്രധാന പ്രശ്നം. മനസ്സിന്റെ ഈ നിഷേധ ജല്പനങ്ങള്‍ സമാധാനം തരില്ല, ആത്മവിശ്വാസം തകര്‍ക്കും. ഈ വിഷമവിര്‍ത്തത്തില്‍ നിന്നാണ് നീ രക്ഷ്പെടെണ്ടത് .

നഷ്ട്ടബോധത്തിന്റെ തടവറയില്‍ നിന്നൊരു ഉയിര്‍ത്തെഴുന്നേല്‍പ്പുണ്ടായേ പറ്റു. ധൈര്യവും നിശ്ചയദാര്‍ധ്യവും ഉണ്ടെങ്കില്‍ ഈ ശൈത്യകാലത്തിനുമപ്പുറം ഊഴം കാത്തുനില്‍ക്കുന്ന വസന്തത്തിനായി മനസ്സ് തുറക്കാന്‍ പറ്റും.

ദുരന്തത്തെ പറ്റിയുള്ള മനസ്സിന്റെ വിലാപ ചിന്തകള്‍ അവഗണിക്കാന്‍ പഠിക്കണം. മുറിവുകളുടെ പേജുകള്‍ മറിച്ചു മനസ്സുവായിക്കുന്ന ദുഖസങ്കിര്‍ത്തനങ്ങള്‍ കേള്‍ക്കാന്‍ ആളുണ്ടെങ്കില്‍ മനസ്സ്  ആവര്‍ത്തിച്ചു കൊണ്ടേയിരിക്കും. തുയിലുണര്‍ത്തുന്ന ഉത്തമ ഗീതങ്ങളിലേക്കും പച്ചമേച്ചില്‍ പുറങ്ങളിലേക്കും സ്വച്ചജല പ്രവാഹങ്ങളിലേക്കും മനസ്സിനെ കൂട്ടികൊണ്ടു പോകണം. വിലാപം പ്രൊമോദമായി മാറുവാന്‍ പുതിയ അനുഭവങ്ങള്‍ വേണം.

മനസ്സിലെ പരിഭവം, പക, വിദ്വേഷം,വെറുപ്പ് തുടങ്ങിയ ഫയലുകള്‍ ഡീലിററ് ചെയ്തേ പറ്റു കുട്ടി. ദുരന്തസ്മരണകളുടെ ലേബലൊട്ടിച്ച പ്രതികാരഫയലുകള്‍ സമാധാനത്തിനു വെല്ലുവിളിയായിരിക്കും. കടക്കരോട് കഷ്മിക്കുന്നത് ഹീലിംഗിനുള്ള സിദ്ധൗഷധമാണ്. ഇക്കാര്യത്തില്‍ ക്ഷമക്കുള്ള പ്രതിയോഗിയുടെ അര്‍ഹതയെക്കാള്‍ നിരായുധീകരണത്തിലൂടെ നമുക്കു ലഭിക്കുന്ന ആന്തരീയ സമാധാനമാണ് പ്രധാനമായിട്ടെടുക്കേണ്ടത്‌.

സ്വയം കുറ്റപ്പെടുത്തുന്നതിനെക്കള്‍ ജീവിതാനുഭവങ്ങളില്‍ നിന്നും പഠിച്ച പാഠങ്ങള്‍ നോക്കി സ്വയം തിരുത്തുകയും തിരിച്ചറിയുകയും ചെയ്യുന്നതാണ്‌ ആരോഗ്യകരം.ജീവിതത്തിന്റെ നിയന്ത്രണവും ശക്തിയും ഇപ്പോഴും നിന്റെ  കയ്യില്‍ത്തന്നെയുന്ടെന്നു വിശ്വസിക്കണം.

ദുഖത്തിന്റെ പ്രവാസ ഭൂമിയയുടെ ഭ്രമണപഥം വിട്ടു പറന്നുയരാന്‍ ശക്തി വേണം- വെറും ശക്തിയല്ല, ശക്തനയവന്റെ ശക്തി. മനസ്സിന്റെ ചിറകുകള്‍ക്ക് കഴുകന്റെ ശക്തി ലഭിക്കുവാന്‍ പ്രാര്‍ത്ഥനയുടെ വഴിയെ നടക്കണം.

ജീവിതം ജയിക്കാനും തോല്‍ക്കാനുമുള്ളതാണ്. പക്ഷെ, തോറ്റുകിടക്കുവാനുള്ളതല്ല. ഒരിക്കല്‍ ഒരിടത്തു സംഭവിച്ച തോല്‍വി വരുവാനുള്ള ജീവിതത്തിന്റെ മുഴുവന്‍  ഗമനവും ആഗമനവും ആയി വിലയിരുതരുത്. തിരകള്‍ മുറിച്ചു മുന്നേറുന്നവര്‍ ഒടുവില്‍ തീരത്ത് എത്താതിരിക്കില്ല.

ഒരു അസുര ജന്മo ജീവിതത്തില്‍ കടന്നുവന്നു നാശനഷ്ടങ്ങള്‍ ഉണ്ടാക്കിയെങ്കിലും ഇനി കടന്നു വരാന്‍ പോകുന്നവരെല്ലാം അങ്ങനെ തന്നെ ആയിരിക്കണമെന്നില്ല. ഇനിയും വാതില്‍ മുട്ടുവനും കടന്നു വരുവാനും നന്മ നിറഞ്ഞ അനേകം  അഭ്യുദയ കാംഷികള്‍ ഈ ലോകത്തുണ്ട്. ധൈര്യമയി മനസ്സിന്റെ സാക്ഷ നീക്കികൊള്ളൂ.

മറ്റുള്ളവരെ പൂര്‍ണ്ണമായി വിശ്വസിക്കാന്‍ കുറച്ചു കാലത്തേക്ക് ബുദ്ധിമുട്ടായിരിക്കും .' റെസിപ്രോക്കല്‍' ട്രസ്റ്റുമായി തല്‍ക്കാലം നീ ങ്ങേണ്ടിവരും. ദാറ്റ്സ് ഒക്കെ. പക്ഷെ,  നിന്നിലുള്ള ദിവ്യ ചൈതന്യത്തെ ഉറച്ചു വിശ്വസിക്കണം.പ്രത്യാശയുടെ അടിത്തറ ഉറപ്പിക്കേണ്ടത് അവിടെ,അവിടെ മാത്രമായിരിക്കണം.

നിങ്ങള്‍ ആരുടെയെങ്കിലും ഹൃദയം തകര്‍ ത്തിട്ടുണ്ടോ ?

ഓര്‍മിക്കുക, അതൊരു ചെറിയ അപരാധമല്ല. അന്നു കത്തിച്ച തീയിപ്പോഴും എ രിഞ്ഞു  കത്തിക്കൊണ്ടിരിക്കയാണ്...

ദൈവത്തിന്റെ സ്വന്തം മണ്ണ് !

ശുചിത്വ ശാസ്ത്രം ആതിപത്യം സ്ഥാപിക്കുന്നതിനു മുന്‍പ്, മണ്ണില്‍ കളിച്ചും മണ്ണില്‍ നടന്നും മണ്ണു ചുരത്തിയ വെള്ളം കുടിച്ചും ജീവിച്ച മനുഷ്യരില്‍ ബാക്ടീരിയകളും വൈറസുകളും അവന്റെ  ഇമ്മുണ്‍ സിസ്റ്റ്ത്തെ ശക്തമാക്കിയിരുന്നത്രേ! മണ്ണില്‍ നിന്നും പ്രകൃതിയില്‍ നിന്നും മനുഷ്യന്‍ അകന്നു പോയതുകൊണ്ടാണ് ഇന്നത്തെ പല ഇമ്മുണ്‍ സിസ്റ്റ്o രോഗങ്ങള്‍ എന്നും, ശുചിത്വ പാലനം ഒബ്സെഷനായ വികസിത രാജ്യങ്ങളിലാണ്‌ ഇത്തരം അസുഖങ്ങള്‍ കൂടുതല്‍ എന്നും മൈക്രോളജി-ഇമ്മുനോളജി  നിരീക്ഷ്ക മേരി മുബുഷ്.

ജനിക്കുമ്പോള്‍ കുട്ടിയുടെ ഇമ്മുണ്‍ സിസ്റ്റം പ്രോഗ്രാം ചെയ്യാത്ത കമ്പ്യൂട്ടര്‍ പോലെ ആണെന്നും, അള്‍ട്രാ ക്ലീന്‍ പരിതസ്ഥിതിയില്‍ കുട്ടികളെ വളര്‍ത്തുമ്പോള്‍ കുട്ടികളിലെ ഇമ്മുണ്‍ റെഗുലേറ്ററി സര്‍ക്യുട്ട് ക്രമപ്പെടുത്തുന്ന ജീവികളെ തടയുകയും സിസ്റ്റം പ്രവര്‍ത്തനക്ഷമ മല്ലാതകുകയും ചെയ്യുന്നത്‌ കൊണ്ടാണ് പ്രതിരോyധ ശേഷി കുറഞ്ഞു പോകുന്നതെന്നുമാണ് ബോസ്സ്റ്റ്ന്‍ ടഫ്ററ്സ്   മെഡിക്കല്‍ സെന്ററിലെ ഡോ. ജോയല്‍വെയ്സ്സ്ടോക്ക്.

 ഒന്നുരണ്ടു ശത്രു  ബാക്ടീറിയകളെ കൊല്ലാന്‍ വേണ്ടി ഭീകര മിസൈലുകളായ ആന്റി ബയോട്ടിക്കുകളായ കാര്‍പെറ്റ് ബോംബിടുമ്പോള്‍ ആരോഗ്യ പരിപലനത്തിനു ആവശ്യമായ പോഷകങ്ങള്‍ ഉല്‍പ്പാദിപ്പിക്കുന്ന ആന്തരീയ മിത്രങ്ങളായ അനേകം ബാക്ടീരിയകള്‍ കാശാപ്പു ചെയ്യപ്പെടുന്നു.

കൃമി കീടങ്ങളോടും മൈക്രോബുകളോടും പടവെട്ടുമ്പോള്‍ മനുഷ്യശരിരത്തിന്റെ പ്രതിരോധ കോട്ടകള്‍ ശുശക്തമാകുമെന്നറിഞ്ഞ  ജീവന്റെയും ജീവികളുടെയും തമ്പുരാന്‍ പറഞ്ഞു: 'എല്ലാം നല്ലത്'

മണ്ണു വാരി കളിച്ചും മണ്ണില്‍ നടന്നും മണ്ണു പുരണ്ടത് തിന്നുമൊക്കെ വളര്‍ന്നോരുകാലം... ചൊറിയും ചിരങ്ങും രോഗങ്ങളുമായി മല്ലിട്ടപ്പോള്‍ നമ്മുടെ പ്രതിരോധ കോട്ടകള്‍ ശക്തമാവുകയായിരുന്നു.
 ഇശ്വരോ ര്ക്ഷ്ത്!

ചില്ല്കൂട്ടിലിട്ടു ഇന്ന് വളര്‍ത്തുന്ന മക്കള്‍ വെയിലേല്കുമ്പോള്‍ വാടിപ്പോകുന്ന ദുര്‍ബല ജന്മങ്ങളാകുന്നത് അവരെ മണ്ണില്‍ നിന്ന് അകറ്റിയതു കൊണ്ടാണന്നു പുതിയ കണ്ടുപിടുത്തം.

സയന്‍സിനു അഭിപ്രായ സ്ഥിരതയില്ല. ഇന്ന് പറയുന്നത് നാളെ മാറ്റി പറയും. അറിവിന്റെ ലോകം അങ്ങിനെയാണ്, തിരിച്ചറിവുകള്‍ മുന്നറിവുകളെ   തിരുത്തിയെഴുതും.

തന്റെ കുട്ടികളെ ജീവന്റെ ജീവനാണ് ശോശാമ്മാന്റിക്ക്. കുട്ട്യാളെ നിലത്തുവയ്ക്കില്ല, നിലം തോടിക്കില്ല. ഒഴിവുകാലം ആസ്വദിക്കുവാന്‍ കുട്ട്യാളെയും കൊണ്ട് ബീച്ചില്‍ വന്നിരിക്കയാണ് സന്തുഷ്ട്ട കുടുംബം. കുട്ട്യാള്‍ക്ക് മണലിലും വെള്ളത്തിലും കളിക്കണം.

നല്ല കാര്യായി, ബാക്ടിരിയയും വൈറസുകളുമുള്ള ചെളിവെള്ളത്തില്‍ കളി
ക്യെ? ഹൈടെക് ആശുപത്രിയിലെ ഹെല്‍ത്ത് വര്‍ക്കര്‍ ആയ ശോശാമ്മന്റി സ്മാര്‍ട്ട്‌ ഫോണില്‍ മിക്കി മൗസ് ഇട്ടുകൊടുത്തു.

 നോ വേ, കിഡ്സ്‌! ദൈവത്തിന്റെ മണ്ണ്‍ നിങ്ങള്‍ക്കുള്ളതല്ല...

പ്രകൃതി സ്നേഹിയായ ദാവീദിന്റെ ബാല്യകാലം മണ്ണിലും മരങ്ങളോടോപ്പവും ആയിരുന്നു. പ്രകൃതിയില്‍ പ്രതിബിംബിക്കുന്ന വിശ്വ ശില്പിയുടെ സര്‍ഗാത്മ ഭാവങ്ങള്‍ അനുഭവിച്ചും ആസ്വദിച്ചുമറിഞ്ഞ ദാവീദ് തന്റെ കവിതകളില്‍ പ്രകൃതിയെ ആത്മഹര്‍ഷങ്ങളാല്‍ അണിയിച്ചൊരുക്കി രൂപവതി ആക്കി:

 "...നീ ഭൂമിയെ സന്ദർശിച്ചു നനെക്കുന്നു; നീ അതിനെ അത്യന്തം പുഷ്ടിയുള്ളതാക്കുന്നു; ദൈവത്തിന്റെ നദിയിൽ വെള്ളം നിറെഞ്ഞിരിക്കുന്നു; ഇങ്ങനെ നീ ഭൂമിയെ ഒരുക്കി അവർക്കു ധാന്യം കൊടുക്കുന്നു.
10 നീ അതിന്റെ ഉഴവുചാലുകളെ നനെക്കുന്നു; നീ അതിന്റെ കട്ട ഉടെച്ചുനിരത്തുന്നു; മഴയാൽ നീ അതിനെ കുതിർക്കുന്നു; അതിലെ മുളയെ നീ അനുഗ്രഹിക്കുന്നു.
11 നീ സംവത്സരത്തെ നിന്റെ നന്മകൊണ്ടു അലങ്കരിക്കുന്നു; നിന്റെ പാതകൾ പുഷ്ടിപൊഴിക്കുന്നു.
12 മരുഭൂമിയിലെ പുല്പുറങ്ങൾ പുഷ്ടിപൊഴിക്കുന്നു; കുന്നുകൾ ഉല്ലാസം ധരിക്കുന്നു.
13 മേച്ചല്പുറങ്ങൾ ആട്ടിൻ കൂട്ടങ്ങൾകൊണ്ടു നിറെഞ്ഞിരിക്കുന്നു; താഴ്വരകൾ ധാന്യംകൊണ്ടു മൂടിയിരിക്കുന്നു; അവർ ആർക്കുകയും പാടുകയും ചെയ്യുന്നു..." (സങ്കിര്‍ത്തനങ്ങള്‍ 65).

"... Oh! pleasant, pleasant were the days,
  The time, when in our childish plays
  My sister Emmeline and I
  Together chaced the Butterfly!
  A very hunter did I rush
  Upon the prey:—with leaps and springs
  I follow'd on from brake to bush;
  But She, God love her! feared to brush
  The dust from off its wings."

-William Wordsworth

-"മധുരിക്കുന്നോര്‍മകളെ  മലര്‍മഞ്ചല്‍ കൊണ്ടുവരു... 

കൊണ്ടുപോകു  ഞങ്ങളെയാ മാംചുവട്ടില്‍...മാംചുവട്ടില്‍..."