ജീവിതത്തിലെ വിസ്മയ അനുഭവങ്ങളും വികാരങ്ങളും മാനസികാരോഗ്യത്തിന്റെ അനുകൂല ചേരുവകളാണെന്നാണ് ഇല്ലിനോയിസ് യൂണിവേഴ്സിറ്റിയിലെ പ്രൊഫസർ ഹെഷ്മാറ്റിന്റെ നിരീക്ഷണം.
ആന്തരിക സംഘർഷങ്ങൾ ലഘൂകരിക്കുവാനും നമ്മിലെ 'ഇന്നർ ക്രിട്ടിക്കി'നെ ശാന്തമാക്കാനും സ്നേഹ മനോഭാവങ്ങൾ ഉദ്ദിപിപ്പിക്കുവാനും വിസ്മയ വികാരങ്ങൾക്കു കഴിയുമെന്നാണ് കെൽറ്റ്നർ എന്ന മനശാസ്ത്രജ്ഞന്റെ അഭിപ്രായം.
വാക്കുകൾക്ക് വിവരിക്കുവാൻ കഴിയാത്തതും ധാരണകൾക്ക് അതീതവുമായ പ്രകൃതിയിലെ വിസ്മയങ്ങൾ നമ്മളിൽ വിനയഭാവം ഉണർത്തും.
സാഹസികത, സഹാനുഭൂതി, അതിജീവനശക്തി, ദൈവ ചൈതന്യം തുടങ്ങിയ സവിശേഷതകളാൽ അനുഗ്രഹീതരായവർ നമ്മളിൽ വിസ്മയവും ആദരവും ഉണ്ടാക്കാറുണ്ട്. മദർ തെരേസയെപ്പോലെ ദൈവോന്മുഖതയുള്ള മനുഷ്യരുടെ നിസ്വാർത്ഥ സേവനങ്ങളും ആർദ്രമനോഭാവവും അനേകരെ സേവനത്തിലേക്ക് വഴി നടത്തിയിട്ടുണ്ട്. ക്രിസ്തുവിന്റെ അനുയായികളെ ഉപദ്രവിച്ചിരുന്ന ശൗൽ സ്നേഹത്തിന്റെ അപ്പോസ്തലനായി മാറിയതിന്റെ പിന്നിൽ ചില വിസ്മയ അനുഭവങ്ങളുടെ സ്വാധീനത്തെപ്പറ്റി അദ്ദേഹം സാക്ഷ്യപ്പെടുത്തിയിട്ടുണ്ട്.
അഹങ്കാരം, ആത്മപ്രശംസ, പൊങ്ങച്ചം തുടങ്ങിയ അപക്വ മനോഭാവങ്ങളെ തിരുത്തിയെഴുതുവാനും കാഴ്ചപ്പാടുകളിൽ മാറ്റങ്ങൾ ഉണ്ടാക്കുവാനും ജീവിതത്തിലെ ദുരന്താനുഭവങ്ങളും തീവ്രവികാരങ്ങളും പലർക്കും കാരണമായിട്ടുണ്ട്.
നിഷേധ വികാരങ്ങളുടെ തീവ്രത കുറയ്ക്കുവാനും മാനസികാരോഗ്യത്തിൽ അനുകൂല മാറ്റങ്ങളുണ്ടാക്കുവാനും സമുന്നത ചിന്തയിലേക്കും ധാരണയിലേക്കും ചുവടുവെക്കാനും വിസ്മയ വികാരങ്ങൾ സഹായകമാകാറുണ്ട്.
ആത്മാവിലും സത്യത്തിലും ദൈവത്തെ അറിയുകയും ആരാധിക്കുകയും ചെയ്യുന്ന വിശ്വാസികൾക്ക്
ദൈവമഹത്വത്തെപറ്റിയുള്ള തിരിച്ചറിവുകൾ ദിശാബോധവും സുരക്ഷിതത്വവും പോസിറ്റിവിറ്റിയും സന്തോഷവും സംതൃപ്തിയും നൽകുമെന്നാണ് സങ്കിർത്തനക്കാരന്റെ സാക്ഷ്യം :
'ദൈവത്തില്‍ മാത്രമാണ്‌ എനിക്ക്‌ ആശ്വാസം;അവിടുന്നാണ്‌ എനിക്കു രക്‌ഷനല്‍കുന്നത്‌.
അവിടുന്നു മാത്രമാണ്‌ എന്റെ അഭയശിലയും കോട്ടയും.എനിക്കു കുലുക്കം തട്ടുകയില്ല.
എന്റെ മോചനവും മഹിമയും ദൈവത്തിലാണ്‌,എന്റെ രക്‌ഷാശിലയും അഭയവും ദൈവമാണ്‌.
മര്‍ത്യന്‍ ഒരു നിശ്വാസംമാത്രം,വലിയവനും ചെറിയവനും ഒന്നുപോലെ മിഥ്യയാണ്‌;തുലാസിന്റെ തട്ടില്‍ അവര്‍ പൊങ്ങിപ്പോകും;അവര്‍ മുഴുവന്‍ ചേര്‍ന്നാലും ശ്വാസത്തെക്കാള്‍ ലഘുവാണ്‌.
സങ്കീര്‍ത്തനങ്ങള്‍ 62 : 1-9
'അത്യുന്നതനായ യഹോവ വിസ്മയനീയൻ ; അവൻ സർവ്വഭൂമിക്കും മഹാരാജാവാകുന്നു.' സങ്കീർത്തനങ്ങൾ 47:2
പ്രകൃതിയിലെ വിസ്മയങ്ങളും സൗന്ദര്യവും ആസ്വദിക്കുന്നവരിൽ സംഘർഷങ്ങൾ കുറവും അനുകൂല വികാരങ്ങൾ കൂടുതലും ആണെന്ന് പഠനങ്ങൾ സൂചിപ്പിക്കുന്നു.
സ്വയകേന്ദ്രീകരണത്തിൽ നിന്നു സാമൂഹ്യ ബന്ധങ്ങളിലേക്കും ഹൃദയ വിശാലതയിലേക്കും ചിന്തകളെ നയിക്കുവാൻ വിസ്മയ വികാരങ്ങൾ സഹായിക്കുമത്രേ. പ്രകൃതിയിലെയും മനുഷ്യരിലെയും വിസ്മയങ്ങൾ തേടിയുള്ള യാത്ര മനസ്സിന്റെ തുറവിയും സിദ്ധതയും ആസ്വാദന നിലവാരവും വർദ്ധിപ്പിക്കും.
വിസ്മയങ്ങളിൽ വിസ്മയിക്കപ്പെടുമ്പോൾ സ്വയത്തിൽ അധിഷ്ഠിതമായ അപക്വ കാഴ്ചപ്പാടുകൾ നിഷ്പ്രഭമാകും. മനസ്സിനെ അമ്പരപ്പിക്കുകയും അതിശയിപ്പിക്കുകയും ചെയ്യുന്ന ജീവിതാനുഭവങ്ങൾ നമ്മിലെ അഹംഭാവത്തെ നിഷ്പ്രഭമാക്കും.
കല, സാഹിത്യം, സംഗീതം, സ്പോർട്സ് തുടങ്ങിയ മേഖലകളിൽ പ്രതിഭാധനരായവരുടെ സർഗ്ഗ പ്രതിഭ ആസ്വദിക്കുമ്പോൾ നമ്മളിൽ ഉണരുന്ന വിസ്മയവികാരങ്ങൾ നിഷേധ ചിന്തകളുടെ തീവ്രത കുറക്കുവാൻ സഹായിക്കും.
വിസ്മയിപ്പിക്കുന്ന നിമിഷങ്ങളും അനുഭവങ്ങളും തേടിയുള്ള ജീവിതയാത്ര ആത്മശരീര മനസ്സുകളിൽ പുത്തൻ ഉന്മേഷം പകരും. ഇതിന് നമ്മൾ, നമ്മളിൽ നിന്ന് പുറത്തു കടക്കണം. സർവ്വശക്തനിലേക്കും അവന്റെ വിസ്മയ സൃഷ്ടികളായ പ്രകൃതിയിലേക്കും മനുഷ്യരിലേക്കും ജീവിതാനുഭവങ്ങളിലേക്കും ആദരപൂർവ്വം കടന്നു ചെന്ന് 'വിസ്മയിക്കുവാൻ' തയ്യാറാകണം.
Awesome people do awesome things awesomely. So step up connect, share the love, stay positive and be amazingly awesome.
(Anonymous)
