തടവറക്കുള്ളിലെ നിഷേധവികാരങ്ങൾ

കെട്ടപ്പെട്ട നിഷേധ വികാരങ്ങൾ ( trapped emotions) മനോ -ശാരീരിക മേഖലകളിൽ അനേകം പ്രതിസന്ധികളുണ്ടാക്കും. തെറ്റായ നിഗമനങ്ങൾ, സംശയം, അമിത വൈകാരിക പ്രതികരണ സ്വഭാവം, വിഷാദം, ആകാംക്ഷ തുടങ്ങിയവയൊക്കെ അനന്തര ദുരന്ത ഫലങ്ങളാണ്. വിവിധ മനോ -ശാരീരിക രോഗങ്ങൾക്കും ഇത്‌ കാരണമായേക്കാം. ഇതിന്റെ പിന്നിലെ പ്രധാന പ്രതികളായ കെട്ടപ്പെട്ട വികാരങ്ങളെ മെഡിക്കൽ ടെക്നോളജിയിലൂടെ കണ്ടുപിടിക്കാൻ ബുദ്ധിമുട്ടാണ്.

ശരീരത്തെ രോഗബാധിതമാക്കുന്നതും സമാധാനം നഷ്ടപ്പെടുത്തുന്നതും ആന്തരിക വൈകാരിക സംഘർഷങ്ങൾ ഉണ്ടാക്കുന്നതുമായ കെട്ടപ്പെട്ട വികാരങ്ങൾ മോചിപ്പിക്കപ്പെടാതെ വൈകാരിക പ്രതിസന്ധികൾ തീരില്ല. രോഗലക്ഷണങ്ങളെ താൽക്കാലികമായി ശാന്തമാക്കാൻ മരുന്നുകൾക്ക് കഴിഞ്ഞേക്കാം. പക്ഷേ, നിഷേധ വികാരങ്ങൾ മോചിപ്പിക്കപെടുന്നതുവരെ സഹനവും സംഘർഷവും തുടർന്നുകൊണ്ടിരിക്കും. വിമോചനം വൈകുന്തോറും പിരിമുറുക്കവും മനോഭാരങ്ങളും വർദ്ധിച്ചുകൊണ്ടിരിക്കും.

 ജീവിതത്തിലെ ദുരനുഭവങ്ങളും മുറിവുകളും വൈകാരിക പ്രതിസന്ധികളുമൊക്കെ കാലം സുഖമാക്കും എന്ന് പറയാറുണ്ട്. അത് പൂർണ്ണമായും ശരിയല്ല. ഓർമ്മയുടെ ഫയലിൽ വൈകാരിക തീവ്രതയോടെ അവയെന്നും ഉണ്ടായിരിക്കും. വേദനിപ്പിച്ചു കൊണ്ടിരിക്കും. ഇത്തരം നിഷേധ വികാരങ്ങളുടെ ലോഡ് ഷെഡ്ഡിങ്ങിലൂടെ മാത്രമേ ആശ്വാസവും ആന്തരിക സൗഖ്യവും ലഭിക്കുകയുള്ളൂ. മാത്രവുമല്ല, പുതിയ സ്വാതന്ത്ര്യത്തിലേക്കും സമാധാനത്തിലേക്കും ആത്മവിശ്വാസത്തിലേക്കും നയിക്കപ്പെടാനും ഇത് ആവശ്യമാണ്.

 'കടക്കാരോട് ക്ഷമിക്കുന്നത് ' വിസ്മയകരമായ മനസ്ശാസ്ത്ര ചികിത്സയും ആത്മ വിശുദ്ധികരണത്തിനുള്ള വഴിയുമാണ്. വഞ്ചന, അപമാനം, പീഡനം തുടങ്ങിയ മുറിവുകളുണ്ടാക്കിയവർക്ക് ക്രിസ്തുവിന്റെ നാമത്തിൽ മാപ്പ് കൊടുക്കുവാനും മറക്കുവാനും തയ്യാറാകുമ്പോൾ തടവറയിലെ നിഷേധ വികാരത്തിന്റെ മേലുള്ള കെട്ടുകൾ അഴിയും. ആന്തരിക തിരമാലകളും കൊടുങ്കാറ്റുകളും ശാന്തമാകും.

“ദരിദ്രന്മാരോടു സുവിശേഷം അറിയിപ്പാൻ കർത്താവു എന്നെ അഭിഷേകം ചെയ്കയാൽ അവന്റെ ആത്മാവു എന്റെമേൽ ഉണ്ടു; ബദ്ധന്മാർക്കു വിടുതലും കുരുടന്മാർക്കു കാഴ്ചയും പ്രസംഗിപ്പാനും പീഡിതന്മാരെ വിടുവിച്ചയപ്പാനും കർത്താവിന്റെ പ്രസാദവർഷം പ്രസംഗിപ്പാനും എന്നെ അയച്ചിരിക്കുന്നു”. ലൂക്കോസ് 4:18-19/ യെശയ്യ 61:1

 ' We never recover until we forgive, forgiveness is the only Healer...' - Alan PatonPaton

✳️

-ഫാ. ഡോ. ഏ. പി. ജോർജ്.